සුළඟ අප රැගෙන යාවි / The wind beneath us

හුරු කතාවක නුහුරු පැතිකඩක් පිළිබිඹූ කරමින් නුදුරු දින තිරගත වීමට නියමිත නුවන් ජයතිලක ගේ ’සුළඟ අප රැගෙන යාවි’’ සිනමා සිත්තම පිලිබදව ඔහු සමග පිළිසදරක යෙදීමට සිත්විය.

කදු වළල්ලකින් වටවුනු පුංචි සුන්දර ගමක්. පරිසරය මවන සුන්දරත්වය පිටත ලෝකයට අරුමයක් උනාට, ඇතිසැටියෙන්ම ගංතුලානේ ඇත්තොන්ට විඳින්න හැකිදැයි කුකුසක්. ලොකු පුංචි හීන දරාගෙන ඇති හැකි දෙකීන් බඩවියත රැකගෙන ජිවත්වෙන උදැනැක්කේ ඉදන් කරුවල වැටෙන කං මහපොලව එක්ක පොරබදන මිනිස්සු ඉන්න ගමක්. පරම්පරා ගනනක් එකට ජීවත්වන කුටුම්බයක් යට සතා සිව්පාවා පවා පවුලේ එකක් තරම ලංවූ බැදීමට එක්වරම හෙනහුරා කෙටු හැටි….

නුවන් ඔබ ගැන සදහනක් කලොත්?

මම නුවන් ජයතිලක.  රත්නපුර ලෙල්ලුපිටිය ජෝ අබේවික්‍රම මහත්තයගෙ ගමේ.ඒත් කලාව දොත දරන් උපන් පුද්ගලයෙකු නෙවෙයි. අක්කාලා දෙන්නෙක් හා නංගිකෙනෙක් අතර හැදි වැඩුනු පවුලේ එකම කොල්ලා නිසාදෝ මාගේ කතාව වෙනස්ම ආරක් ගන්නවා. යහමින් මුදල් හදල් අතමිට නොගවසුනත් සතිපතා පත්තර,පොත් පත් කියවන්න වරම් මට ලැබුනා. මා ලද ලොකුම දායාදය ලෙස මා උපදින විටත් නිවසේ තිබුණු කයි කතන්දර පොත් සලකන්න පුලුවන්. ඒව අතර මා ජිවත් වුනා. ඉස්කෝලේ ඉවරවෙලා ගෙදර ආපු සැනින් මාගේ අත දිගුවන්නේ මේ දේවල් වලට.

නුවන් චිත්‍රපටය නිෂ්පාදනය කරන අතරතුර

මුලික අධ්‍යාපනය ලෙල්ලුපිටිය රාහුල විද්‍යාලයෙන් ද සාමාන්‍ය පෙල විභාගයෙන් පසුව රත්නපුර ධර්මපාල විද්‍යාලයට ඇතුලත් වෙනවා. උසස් පෙල අවසන් කරපු දාට පහුවදාම මම කොලඹට පා තියනවා. කොලඹ කියලා කියන්නේ වෙනම මානයක්. කොලඹ ගම අතර දැඩි පරතරයක් තිබුනා. මොකද රත්නපුර ටවුමට උනත් යන එන එක අපේ ගම්මුන්ට ලොකු දෙයක්.කොලඹට පා තබසු සැනින් සංස්කෘතික පෙරලිය දරාගන්නට සිද්ධ වුනා. ඒ වන විටත් නාට්‍ය උළෙල වල නරබන්න කොලඹ පැමිණෙන එක සිරිතක්.

විශ්ව විද්‍යාලය වෙත ඇතුලත් වෙන අදහස මගෙන් දුරස්වෙලා තිබුනේ. ගෙදරින් එල්ල වූ බලපෑම් නිසා මට නිතිඥයකු වෙන්න වැඩ කරන්න උනා. ඒ සදහා කොලඹ නවාතැන් ගෙන අදාල පන්ති සදහා සහභාගි වෙන්න මට සිද්ධ වුනා. නමුත් මම කලේ පන්ති යෑම පසෙකලා මාගේ මනස හැමදාම ඉල්ලපු සාහිත්‍ය හා නාට්‍ය ලෝකය සොයායන්නට.පස්සෙ මම වේදිනා පරිපාලකයෙක් වෙනව. මේ සෙල්ලම ගෙදරට ආරංචි වෙලා මුදල් ප්‍රතිපාදන කපාහැරියාම මට සිද්ධ වෙනවා පත්තර රස්සාවට යොමුවෙන්න. එතැන් පටන් පත්‍රකලාවේදියෙක්,සහය අධ්‍යක්ෂකවරයෙක්  මෙන්ම චිත්‍රපට අධ්‍යක්ෂකවරයෙක් දක්වා අඛණ්ඩ කල කලා ගමන නිල වශයෙන් ඇරබෙනවා.

ROCK'N CRACK, DEMOCRACY IS, A BEAUTIFUL DAY, SATISFACTION , “KIRUBA” THE DARK PRINCE ලෙසින් මම කෙටි චිත්‍රපට කිහිපයක් නිර්මාණය කලා.ඉන්දියාවේ පූනේ රජයේ සිනමා පාසලේ කෙටි පාඨමාලාවක් කළා.ඒ වගේම අගනුවර ප්‍රධාන දැන්වීම් නිර්මාණ ආයතනයක වෙළද දැන්වීම් දහස් ගනනක් හදන නිශපාදන කන්ඩායමක විවිද ඉසව් වල රැකියාවන් කළා.සහය අධ්‍යක්ශණය ඒ අතර ප්‍රධාන වුනා.

සුළඟ අප රැගෙන යාවි කතාව හිතේ පැලපදියම් වුනේ කොහොමද?

පත්තරකලාවත් එක්ක ඇදුම් කැලි දෙකක් බැග් එකේ දාගෙන රට පුරා ඇවිදින එක පුරුද්දක් වුනා. මීමුරේ ගම මගේ එක්තරා නවාතැනක්. මීමුරේ ඇතුළු අනුයාත ගම්වලට ආවේණික ගැමි සුවඳ  මට පොඩිකාලේ ඉදලාම දැනිලා තිබුනේ. ඒ පැත්තෙ ගොඩාක් කදු තියනව.මම ඉපදුනු ගමත් එහෙමයි.සිරිපාදෙයි ඒ අවට කඩු වලටයි පයින් යන්න පුළුවන්.ඉතින් නිරායාසයෙන්ම මා ඒ නකල්ස් කදු යායට තුලට ඇදී ගියා. දුම්බර මිටියාවතේදි තවලම නෙත ගැටෙනවා. තවලම ඉතා පැරණි ප්‍රවාහන ක්‍රමයක්. තවලම සමග බැඳි වෙනම උපසංස්කෘතියක් තියනවා. අද තවලම අපෙන් ඈත් වෙලා. තවලම අදින හරක් රැකබලාගන්න ඊට ආවේණික පිලිවෙත් තියනවා.  තවලමේ නාම්බන්ට වැස්සියෝ ගැටෙන්න දෙන්නේ නැ. පට්ටි වුනොත් තවලම ඇදලා හමාරයි.ගොන් මඳකිපෙනකොට උන්ව කරාඹනව. හරක් සමග කතා කරන්න වෙනම වාග් මාලාවක් තියනවා.

අපේ අත්තම්මලාගේ මහගෙවල් වලත් ගවයන් ඇතිකරපු නිසා මටත් පොඩිකාලේ ඉදලාම උන් එක්ක ගැවසිලා හුරුවක් තිබුනා. මටත් රත්ති නමින් සුරතල් වැස්සියක් සිටියා. රත්ති සමග ගංගොඩේ හක්කලං කරපු හැටි තාමත් මතකයි.  අත්තම්මා ගවරැලට සලකන හැටි,තුවාල වුනාම බෙහෙත් බදින හැටි දැකලා තියනවා. මේ හැම කරුණු කාරණාවක්ම චිත්‍රපටයේ ප්‍රස්තුතය මගේ හිතේ පැලවෙන්න හේතුකාරණා වුනා.

සරළවම කිව්වොත් ‘’සුළඟ අප රැගෙන යාවි’’ චිත්‍රපටයේ කතාව වන්නේ දුෂ්කර ගමක වෙසෙන කුඩා දරුවන් දෙදෙනකු හා ඔවුන්ගේ සුරතල් වස්සා වන සුද්දා අතර ඇතිවන බැඳිම. දරුවන් හා සත්ත්වයන් අතර ඇතිවන බැදීම කොතරම් ප්‍රබලද කියලා චිත්‍රපටය පුරාවටම සංවාදයට බඳුන් කෙරෙනවා.

මේ  චිත්‍රපටය ඕපපාතික වුනේ නැ. මෙය බිහිවෙන්නේ වසර 4ක් පුරා ඇදීගිය දීර්ඝ ගවේෂණයක් තුලින්. එබැවින් වචනයට නැගිය නොහැකි සිද්ධි සමුහයක් මෙහි ඇතුලත් වෙනවා. ඒවා තේරුම්ගන්නට නම් චිත්‍රපටය නැරඹිම අනිවාර්යයි.

ඔබ චිත්‍රපටය සදහා තෝරාගන්නේ ප්‍රවිණ නළුනිලියන් පිරිසක්. චිත්‍රපටයේ රූගත කිරිම් ගැන සදහනක් කලොත්

අයිරාංගනි සේරසිංහ,ප්‍රියංකර රත්නායක, සම්පත් ජයවීර, අංජන ප්‍රේමරත්න,සුජීව ප්‍රියාල්,සුරංගා රනවක,දයාදේව එදිරිසිංහ,මයුර කාංචන ඇතුළු වේදිකාව මෙන්ම රිදිතිරය ජයගත් නළුනිලියන් පිරිසක් චිත්‍රපටය හා සම්බන්ද වෙනවා. මාත් වේදිකා පරිපාලකයෙක්. වේදිකාවේ රගපෑ කෙනෙක් නිර්මාණය ජීවගුණය හා සාරය කුමක්දැයි යන්න හරියට දන්නවා. එවැනි පිරිසක් සමග වැඩ කිරිමට ලැබිමත් සතුටක්. එමෙන්ම චිත්‍රපට නිර්මාණ කටයුතු කල දක්ෂ තරුණ කාර්යමණ්ඩලයත් සිහිපත් කල යුතුමයි.

මේක වෙනස්ම අත්දැකිමක් නිසා අපට සිද්ධ වුනා නළුනිලියන් රැගෙන ගම්මානයන්ට ගිහින් පුරුදු පුහුණු වෙන්න. ගවයන් සමග ගණුදෙනු කරන ආකාරය පුරුදු පුහුණු වන්නට වුනා. ගැමියන් හට කැමරාව හුරු කරන්නට සිදුවුනා. ප්‍රියංකර රත්නායකයන්ගේ සතුව තිබු පලපුරුද්ද මෙහිදි මනා පිටුවහලක් වුනා.

කදුහෙල් අතර කැමරා රැගෙන රූගත කරද්දි කාලගුණය තීරණාත්මක බලපෑමක් කලා. විටෙක හැමදේම කාලගුණය මත රැදි තිබෙන තත්ත්වයක් පෙන්නුවා. ඇටැංවල පිටවල පතන රිවස්ටර්න් ගම්මාන ගෙදර වගේ. ගැමියන්ගේ සත්කාර නොඅඩුව ලැබුනා. සමහර දාට මම ෂූටින් අවසන් කරලා ගමේ ගෙදරක රැය පහන් කරනවා. ඒ තරම් අපි මේ කතාවට බැදිලා හිටියේ. කෙසේ හෝ අවසන අපි ජයගත්තා. අපි හැමෝගෙම වීර්යයෙන් කතාව යතාර්තයක් බවට පත්වුනා.

ඔබේ චිත්‍රපටයට ලක් දෙරණින් ලද ප්‍රතිචාරය කිව්වොත්,

සෑම සිනමාවේදියෙකුට අත්විදින්නට වෙන කටුක අත්දැකිම් සමුදායට මටත් මුහුණ දීමට සිදුවුනා. චිත්‍රපටය පෙන්වන්න සිනමා ශාලාවක් සොයාගන්න අපහසුයි. පොරොත්තු ලේඛනය මාගලක් වගේ. රිදි දෝත දරා කලා පවුලක උපත නොලැබු මා හට ලොකු අභියෝගයක් තිබුනා.  සිංහල සිනමාවේ පුරෝගාමි යුගේ සිටම පැවත එන මේ ගැටලු දශක ගණනාවක් ගියත් අදටත් විසදිලා නැ.

මම අභියෝගයක් බරාගත්තා. ‘’සුළඟ අප රැගෙන යාවි’’ රැගෙන මේ කොදෙව්වෙන් පිට ලෝකයට ගියා. ඉතාලිය, බ්‍රිතාන්‍ය, අැමරිකාව, නෙදර්ලන්තය, ඔස්ට්‍රේලියාව,ජමනිය,කැනඩාව,ඇමරිකාව,තායිවානය ඇතුලු රටවල් වලට සංචාරය කලා.

චිත්‍රපටයට ලැබුණු ප්‍රතිචාර කෙ⁣බදුද?

ඉතා ඉහල ප්‍රේක්ෂක ප්‍රතිචාරයක් ලැබුනා. ඉතාලියේ දර්ශණ වාරය ගැන කතාකලොත්; ඉතාලියේ අති විශාල ලාංකික ප්‍රජාවක් ජිවත් වෙනවා. ඉතාලි වැසියන් ලාංකිකයන්ගේ රක්ෂාවන් නිසා හදුනනවා වුනත් ඔවුන් නොදුටු සංස්කෘතික දියුනුව මගේ චිත්‍රපටය හරහා දු⁣ටුවා. උබලාට ලස්සන රටක් සංස්කෘතියක් තියෙනවා යැයි ප්‍රේක්ෂකාගාරය හඩනැගුවා.

එතැන් සිට ප්‍රේක්ෂක ඉල්ලිම මත රෝමය ඇතුලුව ඉතාලියේ විවිධ නගර වල දර්ශණ වාර පැවැත්වුන. නෙදර්ලන්තයේ ඇම්ට්‍රඩැම් හි දර්ශණය දුටු පිරිස් මට ඔස්ට්‍රේලියාවේ මෙල්බන් නුවර වෙත චිත්‍රපටය රැගෙන එන ලෙස ඉල්ලම් කලා. ලෝකයේ ප්‍රකට සිනමා උළෙල ගනනාවක් නියෝජනය කරන්නට සුළගඅප රැගෙන යාවි සමත්වුනා. ලෝකය ජයගැනිම චිත්‍රපටය ලැබු භාග්‍යයක් මෙන්ම චිත්‍රපටයෙන් ආමන්ත්‍රණය කරන ගම්මාන වල සිටින ගැමියන් ගේ ලේ කදුලු දහඩියට ලැබුණු අපමණ අගයක්.

ඔබ කිව්වා අන්තර්ජාතික සම්මානයට පවා පාත්‍රවුනා කියලා. ඒ ගැන සදහනක් කලොත්,

• The best feature film - Metricamente corto festival, Italy
• Remi Award - worldfest Houston

ලාංකික ප්‍රේක්ෂකයන්ට කවදාද සුළග අප රැගෙන යාවි සමග සුළගේ පහස විදින්න ලැබෙන්නේ?

පසුගිය දෙරණ,සරසවිය හා යාපනය චිත්‍රපට උළෙල නියෝජනය කිරිමට සුළග අප රැගෙන යාවී සමත්වුනා. ඉතා ඉක්මනින් එනම් ජනවාරි මාසයේදි ලක් ප්‍රේක්ෂකයන්ට චිත්‍රපටය නරඹන්නට හැකියාව ලබෙනවා. ප්‍රධාන නගර වලත් උතුරු නැගෙනහිර පලාත්වල ⁣දමිල උපසිරසි සහිතවත් චිත්‍රපටය ප්‍රදරශණය කිරිම අරමුණයි. සියලුම විස්තර නුදුරු දිනයේදි බලපොරොත්තු වන්න. විමසිල්ලෙන් ඉන්න! සුළඟ අප රැගෙන යාවි…..

ඔබේ ඉදිරි නිර්මාණ කටයුතු ගැන සදහන් කලොත්,

අනාගත නිර්මාණ පිළිබදව දැනටත් මගේ හිතේ වස්තුබීජ කිහිපයක් මෝරමින් තියනවා. ඒ හැම එකක්ම ලංකාවේ මහපොලවේ තියන ප්‍රශ්න ගැන සංවාදයට බඳුන්වන තේමාවන්. මම කතාවක් හදන්නේ වසර  ගනනාවක ගවේෂණයක් කරල. අපේ වෘත්තිය තුල හෘද සාක්ෂියට මුල් තැනක් හිමිවෙනවා.ඒ නිසා ජිවිත කාලය තුල හදන්න පුලුවන් වෙන්නේ කතා 5-6 ක් වගේ. ඒ අල්පමත්‍රය පෙන්වා ගන්නවත් මේ රටතුල ඉඩක් ලැබන්නේ කලාතුරකින්. අප නිර්මාණයක් කර එලිදැක්විය යුත්තේ එය ග්‍රහණය කර ගන්න හැකියාව ඇති පිරිසක් වෙතයි. පෙර සිටි සයිමන් නවගත්තේගම ,ලෙස්ටර් ජේමිස් පිරිස්, මාටින් වික්‍රමසිංහ, සේකර,කේමදාසයන් අතුළු දැවැන්තයින් එවැනි වේදිකාවක් ලංකාව තුල සැකසුවා. අපිත් අද රගන්නේ ඒ වේදිකාව මත. නමුත් අද එය කෙමින් කෙමින් පරිහානියට යෑම දුකට කරුනක්. ඉතින් මම හිතනවා ලෝක සිනමාව තුලට ගිහින් ඒ තුල ලාංකික ජනසමාජය මූලික වු කතාන්දරයක් නිරමාණය කරන්න, ලංකාව හා බාහිර ලෝකය අතර පාලමක් තනන්න. දැනටත් මුල පුරාඇති එම ප්‍ර්‍යාත්නය ගැන නුදුරේදි තොරතුරු බෙදාගන්නම්.

චිත්‍රපට නිර්මාණයෙන් බාහිරව මම හරිම ආසයි මා දන්නා දැනුම නව පරම්පරාව වෙත බෙදා දෙන්න. එය අරඹයා ස්වෙජ්චාවෙන්ම නිරන්තරයෙන්ම වැඩමුළු සංවිධානය කිරිම සිදුකරනවා. පසුගියදා යාපනය විශ්ව විද්‍යාලය කේන්ද්‍ර කරගෙන එවැනි සාර්ථක වැඩමුළුවක් සංවිධානය කලා. ඉදිරියේදිත් දැනුම බෙදාදීම අඛණ්ඩවම සිදුවේවි.

සුළඟ අප රැගෙන යාවි/ The wind beneath us

• Directed by - Nuwan Jayathilake

• Writing Credits - Nuwan Jayathilake

• Producers - Maya Nawagattegama,Nuwan Jayathilake

• Executive Producer - Vimukthi Jayasundara

• Cinematographer - Striner MacKlain Adams

• Original score composer - Chitral Chity Somapala

• Art director - Y.Deshapriya

• Editor - Saman Alvitigala

Cast

• Semini Hennanayake
• Praveen Katukithule
• Sudam Katukithule
• Suranga Ranawaka
• Priyankara Rathnayake
• Iranganie Serasinghe
• Sampath jayaweera
• Anjana premarathna

සංවාද සටහන - රොෂීන් ප්‍රනාන්දු